हाम्रो देश
१० जेष्ठ २०७९, मङ्गलवार

‘रुकुम घटनाले केपी शर्मा ओली र प्रचण्डलाई नंग्यायो’

काठमाडौं । पश्चिम रुकुमको सोती घटनाका दोषिलाई कारवाहीको माग गर्दै माइतीघरमा विरोध प्रदर्शन भएको छ । संयुक्त राजनीतिक दलित संघर्ष समितिको आयोजनामा घटनाका दोषिलाई कारवाही गरी मृतकहरुलाई सहिद घोषणा गर्न माग गरेको छ । धर्ना र प्रदर्शनपछि सम्बोधन गर्दै नेपाल कम्युनिष्ट पार्टी क्रान्तिकारीका वरिष्ठ नेता सिपी गजुरेलले सोती घटना विरुद्ध भइरहेको प्रदर्शन श्रद्धाञ्जली अर्पणमा मात्रै सिमित नभएर कडा रुपमा अगाडी बढाउनुपर्ने बताए ।

संयुक्त राष्ट्रसंघले समेत घटनाका विषयमा चासो देखाएको उल्लेख गर्दे उहाँले जनयुद्धको राप र ताम सेलाएपछि जातिय विभेदका घटना पुनः बढेको बताए । मानवअधिकारकर्मी कृष्ण पहाडीले सोती घटनाले प्रधानमन्त्री केपी शर्मा ओली र नेकपा अध्यक्ष पुष्पकमल दाहाल (प्रचण्ड)लाई नंग्याएको बताए ।

प्रदर्शनकारीहरुले मानवअधिकारको रक्षा गर्दै मृतकलाई सहिद घोषणा गर्नुपर्ने, दोषिलाई कारवाही गर्नुपर्ने र घाइतेहरुको उपचार गर्नुपर्ने बताएका छन् ।