हाम्रो देश
१० माघ २०७७, शनिवार

भारतमा फेरि एक पटक मोदी सरकार सहजै दोस्रो कार्यकाल जित्ने मार्गमा नरेन्द्र मोदी

सुरुवाती मतगणनाका आधारमा वर्तमान प्रधानमन्त्री नरेन्द्र मोदीको पार्टीले सहजै बहुमत हासिल गर्ने देखिएको छ । त्यस्तै भाजपा नेतृत्वको ‘एनडीए’  गठबन्धनले सहजै ३०० भन्दा बढी सिट ल्याउने देखिएको छ । 
सुरुवाती मतगणना परिणाम निर्वाचन लगतै जारी गरिएको मत सर्वेक्षण अनुरुप नै देखिन्छ ।  

भाजपाले दक्षिणका केही राज्यबाहेक सबै ठूला राज्यमा राम्रो प्रदर्शन गरेको छ । केही महिना अघि भएको विधानसभा निर्वाचनमा कंग्रेसले हराएका तीन राज्यमा पनि भाजपाले यसपटक राम्रो मत ल्याएको छ । 

राजस्थान, छत्तीसढ र मध्य प्रदेशमा भाजपाले सन् २०१४ मा राम्रो प्रदर्शन गरेका थियो । तर डिसेम्बरमा भएको विधानसभा निर्वाचनमा कांग्रेससँग हारेको भाजपाले त्यहाँ पुनः जित हासिल गरेको छ ।  

हालसम्मको अवस्थामा छत्तीसगढका ११ सिटमध्य ९ सिटमा भाजपाको अग्रता छ । त्यस्तै राजस्थानको २५ सिटमध्य १ बाहेक सबै सिटमा भाजपा अगाडि देखिन्छ । ती दुई राज्यको तुलनामा बढी सिट रहेको मध्य प्रदेशमा पनि २९ मध्य २८मा भाजपाको मतसंख्या बढी छ । 

भाजपाले यी तीन राज्यका अतिरिक्त विहार, उत्तर प्रदेश, दिल्ली, गुजरातजस्ता हिन्दी भाषी प्रदेशमा राम्रो गरेको छ । भाजपाको उलेख्य अग्रतामा हिन्दी भाषी प्रदेशहरुको सबैभन्दा ठूलो योगदान देखिन्छ । 

विहार 
लोकसभा चुनावको लागि भनेर विहारमा भाजपाले त्यहाँको मुख्यमन्त्री नितिश कुमारको पार्टी जनता दल(युनाइटेड)सँग गठबन्धन गरेको थियो । हाल आएर यो गठबन्धन निक्कै सफल सावित भएको छ । विहारबाट केन्द्रीय संसदमा ४० जना प्रतिनिधि छानिन्छन् । 

ती मध्य ३८ सांसद भाजपा र जनता दल(युनाइटेड)को गठबन्धनबाट छानिने सम्भावना देखिएको छ । लालु प्रसाद यादवको राष्ट्रिय जनता दल र कांगे्रसको गठबन्धनले जम्मा २ सिट जित्ने अवस्थामा छ । 

दिल्ली
राजधानी दिल्लीमा ७ मध्य ७ वटै सिटमा भाजपाको जित हासिल गर्ने लगभग पक्का देखिएको छ । मत सर्वेक्षणले पनि यही परिणाम आकंलन गरेको थियो । 

राजधानी दिल्लीको हैसियत हाल अर्ध–राज्यको मात्र छ । त्यसलाई पूर्ण राज्यको स्तर स्तोरोन्नती गर्नुपर्ने माग राखेर दिल्लीमा सरकार बनाएको आम आद्मी पार्टी समेतले कुनै पनि सिट नजित्ने अवस्था निम्तिएको छ । 

उत्तर प्रदेश
उत्तर प्रदेश भारतको संसदीय चुनावमा सबै बढी सिट भएको राज्य हो । यस राज्यबाट ७१ सांसद चुनिन्छन् । 

अघिल्लो निर्वाचनको तुलनामा उत्तर प्रदेशमा भाजपाको सिटमा कमी आउने देखिएको छ । चुनाव अघि सो राज्यमा पकड भएका समाजवादी र बहुजन समाज पार्टीले गठबन्धन बनाएकाले भाजपाको सिट काटिएको हो । 

‘महागठबन्धन’ नाम दिइएको उक्त गठबन्धनको बलियो प्रतिस्पर्धाको बावजुद भाजपाले ५७ स्थानमा अग्रता लिइरहेको छ । महागठबन्धनले २२ सिट ल्याउने मार्गमा छ भने कंग्रेस जम्मा एउटा क्षेत्रमा मात्र अघि छ ।

उत्तर–पूर्वी राज्यमा पनि भाजपा अघि
उत्तर–पूर्वी राज्यमा पनि भाजपाले सिट संख्या सुधार गर्ने मार्गमा छ । अरुणाञ्चलका दुई मध्य दुवै सिटमा, उत्तर पूर्वको सबैभन्दा ठूलो संसदीय राज्य आसामका १४ मध्य १० मा ,त्रिपुराको दुवै संसदीय सिटमा भाजपाले अग्रता लिईरहेको छ । 

मनिपुर, मिजोरम र नागाल्याण्ड र मेघालयजस्ता थोरै सिट भएका राज्यमा भने उसले निर्वाचनमा त्यति मेहनत गरेका थिएन र परिणामा पनि उसको पक्षमा देखिन्न । त्यहाँ क्षेत्रीय दल अगाडि छन् ।  

बंगालमा प्रभाव विस्तार
चुनाव अघि भाजपाले मेहनत गरेको राज्यमध्य एउटा पश्चिम बंगाल पनि थियो । विगतमा भारतको कम्युनिष्टको आधार क्षेत्र मानिने बंगालमा यस पटक कम्युनिष्टको कुनै पनि सिट नपाउने देखिएको छ । 
सो प्रदेशका ४२ मध्य २३ सिटमा सो राज्यमा सरकार चलाइरहेको त्रिमुल कंग्रेस अगाडि छ । त्यस्तै भाजपा १७ स्थानमा अगाडि रहेर दोस्रो स्थानमा छ । बाँकी दुई सिटमध्य एउटामा कंग्रेस र अर्को स्वतन्त्र उमेद्वार छन् ।

दक्षिण राज्यमा भने कंग्रेस अघि
तर दक्षिणी राज्यमा भने कांग्रेसले अग्रता कायम राखेको छ । केरलाको २० सिटमा १८ मा कंग्रेस अघि बढिरहेको छ । त्यहाँ बाँकी २ सिटमा कम्युनिष्ट पार्टी अघि छ । देशभरीमा कम्युनिष्टको अग्रता रहेको सिट यहीँ मात्र हो ।  

त्यस्तै तमिल नाडुमा डीएमकेसँगको कांग्रेस गठबन्धन उपयोगी सावित भएको छ । त्यस गठबन्धनले ३८ मध्य ३४ सिटमा अग्रता हासिल गरेको छ । भाजपाको गठबन्धन जम्मा ४ सिटमा अघि छ । 
तर दक्षिणी राज्यमै पनि करनाटकमा भने भाजपाले राम्रो मत हासिल गरेको छ । त्यहाँको कुल २८ सिटमा २४ स्थानमा भाजपा अघि छ । 

दक्षिणी राज्यबाहेक कंग्रेसको उलेख्य अग्रता हासिल गरेको ठूलो राज्य पञ्जाव हो । त्यहाँका कुल १३ सिटमा ९ मा कांग्रेस अघि छ । त्यहाँ जम्मा ३ सिटमा भाजपा अघि छ । 
तेलंगाना र आन्द्रमा क्षेत्रिय पार्टी अघि

आन्द्र प्रदेशमा भने क्षेत्रिय पार्टीले बलियो पकड कायम रहदाँ भाजपा र कंग्रेस दुवैले कुनै सिटमा नजित्ने देखिएको छ । त्यहाँको २५ सिटमा २४ सिटमा क्षेत्रिय पार्टी वाईएसआर कंग्रेस पार्टीले अग्रता हासिल गरेको छ । 
आन्द्रबाट छुट्टिएर निर्माण भएको तेलगंना राज्यको यो अलग राज्यको रुपमा पहिलो संसदीय निर्वाचन हो । त्यहाँ पनि क्षेत्रिय दल ‘तेलंगाना राष्ट्र समिति’ले ९ स्थानमा अग्रता लिदाँ भाजपा र कंग्रेस क्रमशः ४ र ३ सिटमा अघि छन् । 

समग्रमा भाजपा एक्लै २७४ सिटमा अगाडि छ भने उसको नेतृत्वमा रहेको एनडीए गठबन्धन ३२२ स्थानमा अगाडि छ । यो भारतमा सरकार बनाउन आवश्यक २७२ सिटभन्दा सजहै धेरै हो । 
अन्तिम परिणाम उल्लेखित अग्रताको थोरै कम–बेसी आउने सम्भावना छ ।

भाजपाको विजयको कारण
भाजपाले यस पटकको निर्वाचन मुलत हिन्दूवादी नारामा लडेको देखिन्थ्यो । त्यस्तै भाजपाले चुनाव नजिकिदै गर्दा पाकिस्तान विरोधी भाषणबाजी पनि चर्काएको थियो । 

पाँच वर्ष शासन गरेर निर्वाचनमा होमिएको पार्टी निर्वाचनमा जादाँ आफूले गरेको कामभन्दा अन्य मुद्दामा केन्द्रीत हुदाँ पनि विपक्षी पार्टीले भाजपाको मुद्धालाई ‘काउन्टर’ दिन गरी गतिलो रणनीति अघि सार्न सकेनन् ।

यस पटक प्रमुख प्रतिपक्षी पार्टी कंग्रेसका अध्यक्ष राहुल गान्धीले भाजपालाई बलियो टक्कर दिने आकंलन गरिएको थियो । भाषण कलामा सुधार गरेका र राजनीतिक रुपमा प्रतिभावान बहिनी प्रियकांलाई पद दिएरै निर्वाचनमा सारेको भए पनि त्यो पर्याप्त भएन ।

निर्वाचन अघि केही महत्वपूर्ण राज्यमा गठबन्धन निर्माण नगर्नु उनको सबैभन्दा ठूलो भूल सावित भयो ।  

सबैभन्दा धेरै संसदीय सिट भएको उत्तर प्रदेशमा कंग्रेस ‘महागठबन्धन’मा सामेल हुन सकेन । त्यस्तै दिल्लीको आम आद्मी पार्टी र बंगालको त्रिमुल कंग्रेससँग पनि गठबन्धनको लागि प्रयाप्त प्रयास गरेको देखिएन ।  

प्रतिकृया दिनुहोस्