वातावरणलाई सन्तुलित राखेर मात्रै बिकास निर्माणको काम होस : मन्त्री यादव

२०७९ असार २८, मंगलवार २२:४४ बजे

वीरगञ्ज, २८ अषाढ । वातावरणलाई सन्तुलित राखेर मात्रै बिकास निर्माणका काम गर्नुपर्नेमा बन तथा वातावरण मन्त्री प्रदीप यादवले जोड दिएका छन् ।

पछिल्लो समयमा बिकासको नाममा बिनाशका गतिविधि हुने गरेकोमा आपत्ति जनाउँदै मन्त्री यादवले पर्यावरणीय सन्तुलनलाई आत्मसाथ गरेर भएका बिकास निर्माण दीगो हुने दावी गरे ।

क्रियाशिल युवा पत्रकार मञ्च नेपाल पर्साले वीरगञ्जमा आयोजना गरेको भेटघाट तथा स्वागत कार्यक्रमलाई सम्बोधन गर्दै मन्त्री यादवले राष्ट्रिय गौरवको योजनाका रुपमा रहेका तराई मधेश द्रुत मार्ग ९फास्ट ट्रयाक०, निजगढ अन्तर्राष्ट्रिय बिमानस्थल लगायतका कामलाई तिव्र गतिमा अघि बढाउने जिकिर गरे ।

उनले भने, “मैले मन्त्रीका रुपमा पदभार ग्रहण गरेको आज एक हप्ता पनि पुगेको छैन, अहिले मन्त्रालयका विषयवस्तुहरु बुझ्ने क्रममा छु, काम र जिम्मेवारी धेरै भएपनि समय अत्यन्तै कम भएकाले मेरो कार्यकाल स्मरणीय बनाउनेमा म बिश्वस्त छु ।”

देशका विभिन्न स्थानमा अवैध रुपमा सञ्चालित क्रसर उद्योगलाई नियमन गर्ने मन्त्री यादवको भनाई छ । अवैध रुपमा सञ्चालित क्रसर उद्योगले चुरे दोहन गरेर मधेशलाई मरुभुमीकरण गरीरहेको हुँदा यसलाई नियमन गर्ने उनको धारणा छ ।

बहुचर्चित नागरिकता विद्येयक पास गराउनका लागि पहल गर्ने प्रतिबद्धता जनाउँदै मन्त्री यादवले जनताको रहर, हरित शहर कार्यक्रम सञ्चालन गरेर श्रावन महिनामा १ करोड विरुवा रोप्ने बताए ।

क्रियाशिल युवा पत्रकार मञ्चले बधाई पत्रसहित मन्त्री यादवलाई उपहारस्वरुप बिरुवा प्रदान गरिएको मञ्चका अध्यक्ष प्रणय कुमार साहले बताए ।

यहाँ प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकट्विटरमा पनि जोडिन सक्नुहुन्छ ।

यो खबर पढेर तपाईलाई कस्तो महसुस भयो ?

ताजा समाचार