एकीकृत समाजवादीका उपमहासचिव भन्छन् : अर्को पार्टीमा विलय हुने रुची छैन

२०७९ पुष १६, शनिबार १७:४४ बजे

काठमाडौं : नेकपा एकीकृत समाजवादीका प्रचार विभाग प्रमुख जगन्नाथ खतिवडाले सरकारमा जाने कि नजाने विषयको छलफल पार्टीको पोलिटब्यूरो बैठकसम्म जानसक्ने बताएका छन् ।

पार्टी कार्यालय, आलोकनगरमा शनिबार बसेको पार्टी स्थायी कमिटीको बैठकबारे जानकारी दिँदै उपमहासचिवसमेत रहेका खतिवडाले स्थायी कमिटी सदस्यहरुले आफ्नो विचारबारे राखिरहेको बताए ।

भोलिसम्म बैठक चल्न सक्ने भन्दै उनले भने, ‘सरकार गठन गर्दा पुरानो गठबन्धन क-कसका कारण तोडियो र नयाँ सरकारबारे हाम्रो धारणा के हुनुपर्छ भनेर धारणा आइरहेको छ । सरकारमा जाने वा नजाने विषयमा पोलिटब्यूरोमा पुगेर टुंगो गर्ने स्थिति पनि हुनसक्छ ।’

एमालेको एकताबारे सोधिएको प्रश्नमा खतिवडाले कुनै पनि एकता गर्ने प्रस्ताव नगरेको र त्यसमा आफूहरुको रुची नभएको बताए ।

यो वा त्यो पार्टीसँग एकता गर्न लागेको भन्ने हल्ला मात्र भएको उनले बताए । ‘औपचारिक वा अनौपचारिक दुबै कोणबाट यस्तो कुरा भएको छैन’, खतिवडाले भने, ‘पार्टी विलय वा एकीकरण गर्ने गरी हामीले काम गरेका पनि छैनौं । त्यसमा हाम्रो रुची छैन ।’

वाम एकताका लागि एजेण्डाहरुमा एकता गर्ने आफूहरुको रुची भएको समेत खतिवडाले बताए ।

यहाँ प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकट्विटरमा पनि जोडिन सक्नुहुन्छ ।

यो खबर पढेर तपाईलाई कस्तो महसुस भयो ?

ताजा समाचार