काठमाडौं : गएराति सशस्त्र प्रहरीले काठमाडौंको दक्षिणकालीस्थित बागमती नदीबाट एक व्यक्तिको सकुशल उद्धार गरेको छ।
राति २ बजे दक्षिणकाली नगरपालिका ८ कटुवाल दहस्थित बागमती नदीबाट सोही ठाउँका ४० वर्षीय रामबहादुर लामालाई सकुशल उद्धार गरिएको सशस्त्र प्रहरी नायव उपरीक्षक शैलेन्द्र थापाले जानकारी दिए। पानीको बहाब कम भएको बेला मंगलबार साँझ नदिपारी गएका लामा बहाब बढेपछि वारि आउँन नसकी नदि किनारको पहरामा फसेका थिए।
लामा नदीमा फसेको खबर पाएपछि सशस्त्र प्रहरी बल २० नम्बर बिपद् उद्दार उपत्यका गणबाट गोताखोरसहितका ९ जना र सशस्त्र प्रहरी १८ नम्बर निलबाराही गण कीर्तिपुरबाट १५ जनासहितको सुरक्षाफौज रातको २ बजे घटनास्थलमा पुगी लामाको सकुशल उद्दार गरेको हो।
मोटरबोटसहित गएको फौजले रोप रेस्क्यु र अन्य बिधिको प्रयोग गरि उद्दार गरेपश्चात लामालाई आफन्तको जिम्मा लगाइएको थापाले जानकारी दिए।
