काठमाडौँ : वरिष्ठ हास्य कलाकार हरिवंश आचार्यको आज ६७ औँ जन्मदिन परेको छ । जन्मदिनको अवसरमा सामाजिक सञ्जाल मार्फत उनलाई थुप्रैले शुभकामना व्यक्त गरिरहेका छन् ।
वरिष्ठ कलाकार मदनकृष्ण श्रेष्ठले पनि सामाजिक सञ्जालमार्फत उनलाई जन्मदिनको शुभकामना दिएका छन् । श्रेष्ठले आचार्यलाई आफ्नो जीवनको अद्वितीय सहयात्री मित्र भन्दै जन्मदिनको शुभकामना दिएका छन् ।
उनले सामाजिक सञ्जालमा लेखेका छन्, ‘मेरो अद्वितीय सहयात्री मित्र हरिवंश, तिमिलाई म के भनूँ । भाइ भनुकी साथी भनूँ । उपमा धेरै म के दिऊ । अरबौँ मान्छेहरूमा तिमी एक मन मिल्ने मान्छे भनूँ । जन्मदिनको हार्दिक मंगलमय शुभकामना ।’ श्रेष्ठले आचार्यलाई निरोगी होस्, चिरायु होस्, शारीरिक सुख, पारिवारिक सुख, सन्तान सुख, मैत्री सुख, सामाजिक सुख, राष्ट्रिय सुख र सबै प्रकारको सुखको समेत कामना गरेका छन् ।
हरिवंश र मदनकृष्णको लामो समयदेखि कलाकारितामा सहकार्य चल्दै आएको छ । दुवै नेपाली कला क्षेत्रमा मह जोडीको रूपमा चिनिँदै आएका छन् ।
