एजेन्सीहरु : अमेरिकाको सिलिकन भ्याली बैंक र सिग्नेचर बैंक टाट उल्टिएको एक साता बित्न नपाउँदै युरोपका बैंकहरुमा पनि समस्या देखिन थालेको छ । अन्तर्राष्ट्रिय सञ्चार माध्यमहरुका अनुसार स्वीटजरल्याण्डको क्रेडिट स्वीज बैंक समस्याग्रस्त बन्न पुगेको छ । हाल उक्त बैंकको समस्या समाधान गर्न स्वीस सेन्ट्रल बैंकले आवश्यक सहयोग गर्ने प्रतिबद्धता जनाएको छ । यद्यपि बैंकको संकट रोकिने छाँटकाँट देखिएको छैन ।
जेनेभास्थित स्वीस इन्फोका अनुसार स्वीस सेन्ट्रल बैंकले क्रेडिट स्वीसका लागि आवश्यक तरलता सहयोग गर्न तयार रहेको जनाएको छ । क्रेडिट स्वीसको शेयर एकै दिन करिब ३० प्रतिशतले घटेपछि बैंक समस्यामा परेको हो । क्रेडिट स्वीसको शेयर बजारमा क्र्यास आएसँगै अब तरलता समस्या आउन सक्ने भन्दै विभिन्न चरणमा छलफल सुरु भएको छ ।
स्वीस सेन्ट्रल बैंकले आवश्यक तरलता सहयोग सहित सबै सहयोग गर्न तयार रहेको जनाएको छ । तर, शेयरको मूल्य लगातार घट््ने क्रम रोकिएको छैन । स्वीस क्रेडिटमा गम्भिर समस्या उत्पन्न भएपछि युरोपभरिका बैंकिङ क्षेत्रमा संकट आउन सक्ने हल्ला फैलिएको अन्तर्राष्ट्रिय सञ्चार माध्यमहरुले जनाएका छन् ।
साउदी नेशनल बैंकको ९.८८ शेयर रहेको क्रेडिट स्वीसका लागि मध्यपूर्वबाट आउनसक्ने सहयोगबारे साउदीस्थित हेडक्वाटरले स्पष्ट पारेपछि झनै तनाव बढेको छ । बैंकको लगानी नीतिका कारण क्रेडिट स्वीस बैंकका लागि थप लगानी गर्न सकिने जनाएको छ । साउदी नेशनल बैंकले १० प्रतिशतभन्दा माथि जान नमिल्ने नीतिका कारण थप पुँजि लगानी असम्भव भएको प्रतिक्रिया दिएसँगै बैंकको समस्या झनै बढ्न पुगेको छ ।
अमेरिकामा दुई बैंक टाट पल्टिएसँगै विश्वभरका बैंकिङ सिष्टमले कडा चुनौतिको सामना गरिरहेको छ । विश्वकै सबैभन्दा ठूलो अर्थतन्त्र भएको अमेरिकामा दुर्ई डुबेसँगै तनावमा रहेका विश्वभरका बैंकहरुलाई थप तनाव दिने गरी युरोपको क्रेडिट स्वीस समस्यामा परेसँगै अब युरोपका बैंकहरुको सुरक्षा चिन्ता बढेको छ ।
क्रेडिट स्वीस समस्यामा पर्नुमा आन्तरिक व्यवस्थापन र सही रिपोर्टिङ नभएको अमेरिकी सञ्चार माध्यम सिएनएनले जनाएको छ ।
ब्लुमबर्गका अनुसार समस्याग्रस्त क्रेडिट स्वीसका लागि तत्काल ५४ बिलियन तरलता आवश्यक पर्नेछ । ५४ बिलियन डलर भनेको नेपाली रुपैयाँ करिब ७१ खर्ब रुपैयाँ क्रेडिट स्वीसका लागि आवश्यक परेको छ । स्वीस नेशनल बैंकको जम्मा ५० बिलियन स्वीस ऋण उपलब्ध गराउन सक्ने जनाएको छ । क्रेडिट स्वीसलाई बचाउन अझै ठूलो मात्रामाा रकम अभाव रहेको देखिएको छ ।
यहाँ प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ ।
