हाम्रो देश
१४ असार २०७९, मङ्गलवार

अङ्ग्रेज​लाई पराजित गरेको ऐतिहासिक दिन विजय उत्सव मनाइयाे

नेपाल–अङ्ग्रेज युद्धमा नेपालले जीत हासिल गरेको ऐतिहासिक स्थल बुटवलको जीतगढी किल्लामा सम्झना स्वरुप आज जीतगढी विजयी उत्सव दिवस मनाएको छ । विगतमा वर्षमा भव्य रुपमा दिवसलाई मनाउने गरिएपनि आज भने कोरोना कारणले स्वास्थ्य मापदण्ड अपनाएर मनाइएको हो ।

वि.सं. १८७२ वैशाख ७ गते आजकै दिन नेपालले अङ्ग्रेजलाई पराजित गरेको थियो । विजय उत्सव दिवसका अवसरमा बुटवल उपमहानगरपालिकाले आज सम्पदा स्थलमा कार्यक्रमको आयोजना गर्दै कर्णेल उजिरसिंहको शालिकमा माल्यार्पण गरिएको छ ।

जीतगढीको संरक्षण गर्दै पर्यटनको केन्द्र बनाउने गुरुयोजना

किल्लालाई संरक्षण गर्दै पर्यटनको केन्द्र बनाउने गुरुयोजनाअनुरुप उपमहानगरले अहिले धमाधम काम गरिरहेको छ । जीतगढीको महत्व र गरिमा नयाँ पुस्तालाई बुझाउने गरि बुटवलले स्थानीय पाठ्यक्रममा समेत यो विषयलाई समावेश गरेको छ ।

जितगढीमा उतिबेलाकै झल्को दिने खालको कलात्मक गेट, उस्तै पोशाकका कर्णेल उजिरसिंहको पूर्ण कदको शालिक, उनीसंगै लडेका नेपाली सेनाका १२ जना कमाण्डरहरुको अर्धकदको शालिक र छेउमा विशाल राष्ट्रिय झण्डा फहराउने गरि गुरुयोजना अनुरुपका काम अगाडि बढेको उपमहानगरका प्रमुख शिवराज सुवेदीले बताए । त्यतिबेला खनिएको सुरुङको उत्खनन् गरी संरक्षण गर्ने काम पनि भइरहेको छ ।

जितगढीलाई बृहत बुटवलको पर्यटन सर्किटको आधार क्षेत्र, नेपाली वीरताको ऐतिहासिक केन्द्रका रुपमा लिएर त्यस वरपरका ऐतिहासिक, पुरातात्विक, धार्मिक र सांस्कृत महत्वका क्षेत्रलाई एउटै सर्किटमा जोड्ने गरि गुरुयोजना बनाइएको प्रमुख सुवेदीको भनाइ छ ।