हाम्रो देश
१२ असार २०७९, आइतवार

जनप्रिय प्रधानमन्त्री ओलीविरुद्ध अविश्वासको प्रस्ताव नआउने

काठमाडौं-   प्रधानमन्त्री केपी शर्मा ओलीविरुद्ध अविश्वासको प्रस्ताव तत्कालका लागि टरेको छ । जनता समाजवादी पार्टीले साथ दिने भएपछि तत्कालका लागि उक्त सम्भावना टरेको हो ।

जसपाको माग अनुसार उक्त पार्टीका नेता तथा कार्यकर्तामाथि लागेका कतिपय मुद्दा फिर्ता लिने निर्णय गरेर उनले औपचारिक सम्झौताको ढोका उघारेका छन् । १ सय २० जना जसपा नेता तथा कार्यकर्ताको मुद्दा फिर्ता भएको छ । जसपा अध्यक्ष महन्थ ठाकुरसँग पनि ओलीले आजै छलफल गरेका छन् । दुई नेताबीच सत्ता समिकरणबारे कुराकानी भएको बुझिएको छ ।

जसपासँग सरकारले बुँदागत रुपमा सम्झौता गर्ने तयारी समेत गरेको छ । जसमा नेता तथा कार्यकर्तामाथि लागेको बाँकी मुद्दा फिर्ता लिने, संविधान संशोधनका लागि अध्ययन कमिटी बनाउने, नागरिकतालगायत समस्या समाधान प्राथमिकतामा छन् । सम्झौता भएमा जसपा ओली सरकारमा सहभागी हुने बुझिएको छ ।

जसपा सरकारमा जाने तयारीसँगै प्रधानमन्त्री ओलीविरुद्ध बन्न लागेको समिकरण बन्न कठिन भएको छ । यसअघि काँग्रेस, माओवादी केन्द्र र जसपाबीच समिकरण बनाएर ओलीलाई हटाउने तयारी भएको थियो । जसपाले साथ नदिँदा काँग्रेस अगाडि बढ्न सकेन ।

जसपा ओली सरकारलाई साथ दिन पुगेपछि सत्ता संकट पनि टर्ने सम्भावना बलियो भएको छ । अब प्रधानमन्त्री ओलीलाई माओवादी केन्द्रले दिइआएको समर्थन फिर्ता लिने निश्चित भैसकेको छ । केही दिनभित्रै प्रचण्डले यसबारे निर्णय लिने बुझिएको छ । माओवादीले समर्थन फिर्ता लिएमा ३० दिनभित्र प्रधानमन्त्री ओलीले विश्वासको मत लिनुपर्ने हुन्छ ।