हाम्रो देश
२१ साउन २०७८, बिहिवार

रोनाल्डोका कारण कोकाकोलालाई अरबौं डलर घाटा लाग्दा फेविकोलले फाइदा उठायो

काठमाडौं। पोर्चुगलको फुटबल टिमका कप्तान क्रिस्टियानो रोनाल्डोले आफ्नो खेलअघिको पत्रकार सम्मेलनमा आफ्नो अगाडि राखिएका कोकाकोलाका बोतल हटाएपछि यसले विश्व बजारमा हलचल ल्यायो । केही सेकेण्डको यो घटनाले एकाएक कोकाकोलाको शेयर मूल्यमा भारी गिरावट आयो र कोकाकोलाको मूल्यमा ४ अर्ब डलर कमी आयो । तर, यो घटनाबाट अर्को प्रसिद्ध ब्राण्ड फेविकोलले भने फाइदा उठाएको छ ।

फेविकोलले यो घटनाको फाइदा उठाउने गरी सिर्जनशीलता देखाउँदै ट्वीटरमा एउटा पोस्ट गरेको छ जुन पोस्ट निकै भाइरल भइरहेको छ । यो फोटोमा प्रतिकात्मक रुपमा पूरै सेटअप रोनाल्डोको पत्रकार सम्मेलनको जस्तै राखिएको छ । यसमा एउटा कुर्सी छ र रोनाल्डोको पत्रकार सम्मेलनमा जहाँ कोकाकोलाका बोतल थिए त्यो ठाउँमा फेविकोलका २ वटा बट्टा राखिएका छन् । यसमा सबैभन्दा रोचक फेविकोलको ट्यागलाइन छ जसमा लेखिएको छ ‘न बोतल हट्नेछ न मूल्य घट्नेछ ।’

फेविकोलले टाँस्ने काम गर्छ । यो लाइनमार्फत फेविकोलले आफ्नो ग्लुले टाँसेको कुरा त्यहाँबाट हटाउन नसक्ने संकेत गर्दै आफ्नो प्रचार गरेको छ । फेविकोलको यो प्रचार धेरैले रुचाएका छन् । सामाजिक संजालमा एक प्रयोगकर्ताले फेविकोललाई आफ्नो यो प्रचार बनाउने क्रिएटिभ टिमलाई सिर्जनशीलताको लागि पारिश्रमिक बढाउन सुझाव दिएका छन् । यसबाहेक धेरै सामाजिक संजाल प्रयोगकर्ताहरुले फेविकोलको यो सिर्जनशीलताको प्रशंशा गरेका छन् ।