हाम्रो देश
१० जेष्ठ २०७९, मङ्गलवार

लोकप्रिय अभिनेत्री पाकेट मारेको आरोपमा पक्राउ

बंगाली चलचित्र उद्योगकी लोकप्रिय अभिनेत्री रुपा दत्ता पक्राउ परेकी छिन् । प्राप्त समाचार अनुसार रुपालाई पकेट मारेको आरोपमा प्रहरीले पक्राउ गरेको हो । यो घटना कोलकाता अन्तर्राष्ट्रिय पुस्तक मेलाको दौरान भएको थियो। एक जना प्रहरी अधिकृतले सार्वजनिक स्थलमा एक महिलालाई फोहोरमा झोला फाल्दै गरेको देखेका थिए । त्यसपछि शंकाको आधारमा ती महिला समातिएकी थिइन् ।

विधान नगर उत्तर प्रहरी चौकी स्रोतका अनुसार शनिबार एक महिलाले डस्टबिनमा झोला फाल्दै गर्दा शंका लागेर प्रहरीले ती महिलालाई सोधपुछ गरेको थियो । साथै उनको झोलाको पनि खानतलासी गरिएको थियो । त्यसमा प्रहरीले धेरै नगद बरामद गरेको थियो भने प्रहरीले त्यसमा अरू थुप्रै पर्स भेट्टाएको थियो ।

अनुसन्धानमा ती महिलाले पनि आफूले विभिन्न ठाउँमा गएर यस्तो गरेको स्वीकार गरिन् । महिलाले मेला, कार्यक्रम र मानिसहरूले भरिएको स्थानहरू गएर पकेट मार्ने गरेको बताइन् । पछि ती महिला रुपा रहेको खुल्यो ।

प्रहरीका अनुसार रुपा दत्ता त्यही अभिनेत्री हुन् जसले केही वर्षअघि फिल्म निर्माता अनुराग कश्यपलाई यौन उत्पीडनको गलत आरोप लगाएकी थिइन् । सन् २०२० मा रुपा दत्ताले अनुराग कश्यपलाई फेसबुकमा गलत सन्देश पठाएको आरोप लगाएको थिइन् । तर पछि अनुरागको नाम लिएर रुपा अर्को व्यक्तिसँग कुरा गरिरहेको खुलासा भयो । रुपाले आफ्नो च्याटको स्क्रिनसट ट्वीटमा सेयर गरेकी थिइन्।