हाम्रो देश
१२ जेष्ठ २०७९, बिहिवार

दुई लाख बढी सङ्क्रमित हुने भारत सातौँ राष्ट्र, अमेरिकामा एकै दिन एक हजारको मृत्यु

काठमाडौँ, जेठ २१ गते।। भारतमा कोरोनाभाइरसबाट सङ्क्रमित हुने दुई लाख नाघेको छ । पछिल्लो चौबिस घण्टामा आठ हजार ९०९ जना सङ्क्रमित थपिएसँगै भारतमा कोभिड–१९ बाट सङ्क्रमित हुनेको सङ्ख्या दुई लाख सात हजार ६१५ पुगेको छ ।

अमेरिकाको बाल्टीमोरस्थित जोन हप्कीन्स विश्वविद्यालयका अनुसार संयुक्त राज्य अमेरिका, ब्राजिल, रसिया, बेलायत, स्पेन, इटालीपछि दुई लाख बढी सङ्क्रमित हुने भारत सातौँ राष्ट्र बनेको छ । अमेरिकामा १८ लाख ३१ हजार ८२१, ब्राजिलमा पाँच लाख ५५ हजार ३८३, रुसमा चार लाख २३ हजार १८६ र बेलायतमा दुई लाख ७९ हजार सङ्क्रमितको पुष्टि भएको विश्वविद्यालयले जनाएको छ । स्पेनमा दुई लाख ३९ हजार ९३२ र इटालीमा दुई लाख ३३ हजार ५१५ जना सङ्क्रमित छन् ।

स्पेन, फ्रान्स र इटालीमा सङ्क्रमणदर स्थिर देखिएको छ । रुस, ब्राजिल र भारतमा सङ्क्रमित थपिने दर उच्च भएको छ । ब्राजिलमा पछिल्लो चौबिस घण्टामा २८ हजारभन्दा बढी सङ्क्रमित थपिएका छन् । भारतमा सबैभन्दा बढी सङ्क्रमित महाराष्ट्र राज्यमा दर्ता गरिएको छ ।

दुई लाख सङ्क्रमितमध्ये भारतको महाराष्ट्र राज्यमा मात्रै ७२ हजारभन्दा बढी छन् । राजधानी दिल्लीमा २२ हजार १३२ जना सङ्क्रमित छन् । नयाँ दिल्लीमा सङ्क्रमित हुनेको सङ्ख्या तीव्र रुपमा वृद्धि भइरहँदा राज्यका मुख्यमन्त्री अरविन्द केजरीवालले एक साताका लागि राज्यको सीमा सिल गर्ने घोषणा गर्नुभएको छ ।

भारतमा कोरोना सङ्क्रमणबाट पाँच हजार ८१५ जनाको मृत्यु भएको छ । सबैभन्दा बढी महाराष्ट्रमा दुई हजार ४६५ जनाको मृत्यु दर्ता गरिएको छ । मध्यप्रदेशमा ३६४ जनाको मृत्यु भएको हो ।

भारतमा सङ्क्रमण तीव्ररुपमा वृद्धि भइरहँदा निको हुने दरमा सुधार देखिएको छ । हालसम्म एक लाख ३०३ जना कोरोनाभाइरसबाट मुक्त भई घर फर्केका छन् ।

उता, कोरोनाभाइरस सङ्क्रमणको केन्द्र बनेको संयुक्त राज्य अमेरिकामा पछिल्लो एक सातामा सबैभन्दा बढी मृत्यु दर्ता गरिएको छ । कोरोनाभाइरसबाट कुनै समय दैनिक मृत्यु हुनेको सङ्ख्या तीन हजारसम्म पुगेको अमेरिकामा पछिल्लो चौबिस घण्टामा एक हजार ८१ जनाको मृत्यु भएको छ ।

अमेरिकामा कोरोनाभाइरस सङ्क्रमणबाट एक लाख छ हजार १८० जनाको मृत्यु भएको हो । विश्वभरि कोरोना सङ्क्रमणबाट करीब तीन लाख ८० हजार २५१ जनाको मृत्यु भएको छ ।