काठमाडौँ : मन्त्रालय परिवर्तन भएपछि असन्तुष्ट बनेका गण्डकीका स्वतन्त्र सांसद राजीव गुरुङ (दीपक मनाङे)ले राजीनामा दिएको बताएका छन् । सोमबार कांग्रेस एमालेको सहमतिअनुसार मनाङेलाई भौतिकबाट मन्त्रालय सारिएको थियो ।
त्यसपछि उनले राजीनामा दिएको बताएका हुन् । तर मुख्यमन्त्रीसमक्ष उनको राजीनामा नपुगेको मुख्यमन्त्री कार्यालय स्रोतले जनाएको छ । ‘वन प्रदेशले हेर्नै पाउँदैन । वनमन्त्री चाहिँदैन । प्रदेशले तीतेपातीको घारी, असुराको घारी मात्र हेर्ने हो’, मनाङेले भने ‘वन अहिले पनि संघले हेरिराछ ।’
साथै उनले वन मन्त्रालय कांग्रेसको कोटामा रहेको पनि बताएका छन् । ‘म कांग्रेसको सांसद हैन, स्वतन्त्र सांसद हुँ । कांग्रेसको कोटाको मन्त्री कांग्रसकै सांसदलाई देऊ भनेको छु’, मनाङेको भनाइ छ ।
उनले अहिले दलहरूले वन मन्त्रालय छ भनेर बेवकुफ बनाएको भन्दै जुन दिन प्रदेशले वन मन्त्रालय हेर्न पाउँछ सोही दिन मन्त्री हुने समेत बताएका छन् ।