काठमाडौँ : बहुचर्चित नारायणहिटी दरबार हत्याकाण्ड भएको आज २२ वर्ष पूरा भएको छ । आज तत्कालीन राजा वीरेन्द्र र उनको सपरिवार मासिने गरी भएको सो दर्दनाक हत्याकाण्डको सम्झना गरिँदैछ । स्व. राजा वीरेन्द्रको सम्झनामा आज देशभर विभिन्न कार्यक्रम गरी स्मरण गरिँदैछ ।
वि.सं. २०५८ जेठ १९ गते साँझ नारायणहिटी राजदरबारभित्र तत्कालीन राजा वीरेन्द्र शाहको वंश विनास भएको थियो । राजदरबार हत्याकाण्डमा राजा वीरेन्द्र, रानी ऐश्वर्य, युवराज दीपेन्द्र, राजकुमार निराजन, राजकुमारी श्रुतीसहित अन्य थुप्रै आसेपासे र विशिष्ट व्यक्तिको निर्मम हत्या भएको थियो । तर यस हत्याकाण्डको रहस्य अझैसम्म पनि खुल्न सकेको छैन ।
तत्कालीन युवराज दीपेन्द्रले नै परिवारका सबै सदस्यहरुलाई गोली हानेको र पछि आफैँलाई गोली हानेको भनेर छानबिन प्रतिवेदन सार्वजनिक गरिए पनि नेपाली नागरिकहरुले त्यसलाई विश्वास नै गरेका छैनन् । षड्यन्त्रपूर्वक वंश विनाशको उक्त घटना रचिएको हो भन्नेमा राजनीतिक दलका नेताहरु, नेपाली जनता र जानकारहरुले बताउँदै आएका भए पनि यसको निष्पक्ष र गहन अनुसन्धान हुनै सकेको छैन ।
उच्च सुरक्षा घेराभित्र रहेको राजदरबारमा भएको त्यो वंशविनाशक हत्याकाण्ड नेपाली इतिहासकै कहालीलाग्दो काण्ड मानिन्छ । पटकपटक उच्च राजनीतिक नेतृत्व र प्रधानमन्त्रीहरुबाट यस काण्डको अनुसन्धान गरिने आस्वाशन दिइँदै आइको भए पनि अनुसन्धान गर्ने हिम्मत कसैले जुटाउन नसक्दा सो हत्याकाण्ड अहिले पनि रहस्यकै गर्भमा छ ।
