काठमाडौं : प्रधानमन्त्री पुष्पकमल दाहाल प्रचण्डले एमालेसँग लामो गृहकार्यपछि सहकार्य थालेकाले तत्कालै नटुट्ने पार्टी बैठकमा ब्रिफिङ गरेका छन् ।
पार्टी कार्यालय पेरिसडाँडामा बसेको स्थायी कमिटीको बैठकमा उनले कांग्रेसको संविधान विरोधी गतिविधिबाट आफू झस्किएपछि नयाँ समीकरणमा जानुपर्ने बताए ।
उनले भनाई उदृत गर्दै एक नेताले भने, ‘कांग्रेसबाट सरकार सञ्चालनमा सहयोग भएन । अर्थमन्त्रीले साथ दिनुभएन । कोशीमा हामीले पटकपटक धोका पायौं । त्यसैले यहाँबाट अघि बढ्न नसक्ने निष्कर्ष निकालेर मैले नयाँ कदम चालेको हुँ ।’
उनले महासमितिको बैठकमा पनि हिन्दू धर्मको पक्ष वकालन गर्दै संविधानविरोधी काम भएको बताए ।
उनले थपे, ‘कांग्रेससँगको गठबन्धनबाट राष्ट्रियताको न संरक्षण हुन्छ न समाजवादउम्मुख काम हुन्छ । त्यसैले एमालेसहितको नयाँ समीकरण थालेका छौं । यो हामीले लामो गृहकार्यपछि थालेकाले यहाँ समस्या हुँदैन ।’
