काठमाडौं : राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले जनताको आशा र भरोषाको पार्टी राप्रपाबाहेक अरु कुनै हुन नसक्ने जिकिर गरेका छन् । पार्टीको प्रशिक्षण कार्यक्रमलाई शनिबार सम्बोधन गर्दै उनले राप्रपाको सदस्य भन्न अहिले लाज मान्नुपर्ने अवस्था नरहेको बताए ।
उनले भने, ‘साढे तीन दशकदेखि कर्णालीको मत लिइरहेका छन्, तर त्यहाँको जनताको जीवनस्तर जहाँको तहीँ छ । मतदाताले अहिले विकल्प खोजिरहेका छन् । त्यहाँको विकल्प हामी हौं भनेर क्रियाशील बनायौं भने, लाग्यौं भने हामीलाई चुनाव जित्न कठिनाइ छ भन्ने लागेको छैन ।’ उनले गएको चुनावमा जुम्लामा एमालेसँग सहयोग माग्दा अध्यक्ष ओलीले आफूलाई खिस्याएर बोलेको स्मरण गरे ।
उनले भने, ‘ज्ञानेन्द्र शाही पार्टीमा जोडिएपछि मैले उहाँलाई जुम्लामा चुनाव लड्नुपर्छ भनें । उहाँले स्वीकार्नुभयो । उहाँको व्यक्तित्व र हाम्रो विश्लेषणले काम गर्यो । सहकार्यको विषयमा कुरा गर्दा हामीले केपी ओलीसँग कुरा गर्यौं । कांग्रेस र माओवादी गठबन्धनको ३६ हजार मत छ । हाम्रो ५०० मात्रै छ । तपाईंहरुको १२ हजारमात्रै छ । एमालेले जित्दैन, दुइटा प्रदेश लिएर सहयोग गरिदिनुस् भन्दा उहाँले कडा खिस्याएर ५०० लाई केको लागि सहयोग गर्ने भन्नुभयो । मान्नुभएन । तर, परिणाम आयो ।’
उनले प्रचण्ड नेतृत्वको सरकारको उपलब्धि भनेकै १०० दिन टिक्नु भएको बताए । सरकार भ्रष्टाचारीको रक्षाकवच बनेको उनले आरोप लगाए ।
यो खबर पढेर तपाईलाई कस्तो महसुस भयो
+1
+1
+1
+1
+1
1
+1
