काठमाडौं : राष्ट्रिय प्रजातन्त्र पार्टी (राप्रपा)का सांसद दीपक बोहोराको बुधबार पशुपति आर्यघाटमा अन्तिम संस्कार गरिने भएको छ ।
रुपन्देहीको निर्वाचन क्षेत्र नम्बर ३ बाट निर्वाचित बोहराको पार्थिव शरीर बुधबार भैरहवाबाट काठमाडौं ल्याएर पशुपति आर्यघाटमा अन्तिम संस्कार गरिने भएको हो । मंगलबार बिहान ओम अस्पतालमा उपचार क्रममा उनको निधन भएको थियो । उनको पार्थिव शरीरलाई मंगलबार नै हेलिकोप्टरमार्फत् गृहनगर भैरहवास्थित निवास लगिएको थियो । सोअघि उनको पार्थिव शरीरलाई सिद्धार्थनगर नगरपालिका परिक्रमा गराइएको थियो ।
श्रद्धाञ्जलिका लागि उनको पार्थिव शरीरलाई आफ्नै निवासमा रहेको पार्टी कार्यालयमा राखिएको राप्रपाले जनाएको छ । बुधवार बिहान काठमाडौँ ल्याएर श्रद्धाञ्जलीका लागि धुम्बाराहीमा रहेका पार्टी केन्द्रीय कार्यालयमा राखिने र बुधबार नै आर्यघाटमा अन्तिम संस्कार गर्ने तयारी राप्रपाको छ।
२०७९ सालको आम निर्वाचनमा बोहोराले नेपाली कांग्रेसका प्रभावशाली नेता बालकृष्ण खाणलाई फराकिलो मतान्तरमा हराएका थिए । २०७७ सालमा कोरोना संक्रमण भएका उनलाई घाँटीमा संक्रमण भएको थियो । नेपाल, भारत र अमेरिकामा उपचार गराएका उनलाई चिकित्सकले नबोल्न सुझाएका थिए । बिरामी भएपछि सांसद बोहोरा संसदमा खासै देखिएका थिएनन् ।
