काठमाडौँ : इन्द्रजात्राको अवसरमा काठमाडौं महानगरपालिकाका मेयर बालेन्द्र शाहको तस्बिर अंकित टिसर्ट लगाएर बसन्तपुर पुगेका १३ जनालाई प्रहरीले नियन्त्रणमा लिएको छ । उनीहरूलाई काठमाडौं प्रहरी बृत्त जनसेवामा राखिएको छ ।
बालेनको टिसर्ट लगाएका आएका व्यक्तिहरूलाई स्थानीयहरूले विरोध गरेपछि उनीहरूकै सुरक्षाका लागि नियन्त्रणमा लिएको प्रहरीले दाबी गरेको छ । ‘कार्यक्रममा बालेनको पक्षमा नाराजुलुस गर्ने स्थिति आएपछि त्यसलाई रोक्न युवाहरूलाई पक्राउ गरिएको हो’ एक प्रहरी अधिकृतको भनाई छ ।
तर काठमाडौं प्रहरीका प्रवक्ता एसपी नवराज अधिकारीले जात्रामा भगवानको प्रचारप्रसार गर्ने हो भन्दै स्थानीयले त्यसबाहेकका गतिविधि हुन नदिन आग्रह गरेपछि प्रहरीले युवाहरूलाई नियन्त्रणमा लिएको दाबी गरे ।इन्द्रजात्राको अवसरमा मंगलबार प्रधानमन्त्री केपी शर्मा ओली पनि बसन्तपुर जाने कार्यक्रम छ ।
