उर्लाबारी : मोरङको सुन्दरहरैँचा–५ तीनपैनीका कृष्णबहादुर शाहीको मृत्युपछि उनका पाँच जना छोरीहरू र आमा टीका दशगात्र किरियामा बसेका छन् ।
शाहीको कात्तिक ६ गते मिर्गौला र कलेजो रोगका कारण निधन भएको थियो । शाहीका पाँच छोरीहरू छन् । परम्परागत हिन्दु संस्कारअनुसार परिवारका छोरा वा पुरुष सदस्यले मात्र किरिया बस्ने चलन छ । शाहीका पाँचै जना छोरीहरूले मिलेर आफ्ना पितालाई दागबत्ती दिए । दशगात्र किरिया कर्म पनि गरिरहेका छन्।
मृतक शाहीको इच्छाअनुसार नै छोरीहरूले दागबत्ती दिएर काज किरिया गरेको आमा टीका शाहीले बताए । “बुवाले किरिया गर्ने कोही नखोज्नु आफै गर्नु भन्नुभएको थियो, त्यसैले बुबाको अन्तिम इच्छा पूरा गरिदिएका हौँ, छोरी जेनिसाले भने ।
जेनिसासँगै जस्मीन, कृष्टिना, कसिस र प्रेरणाले कपाल मात्र खौरिएका छैनन्, अरू सबै भेष किरियापुत्रीको जस्तै छ । सामाजिक कर्म पनि सबै प्रक्रिया पुगाएर गरिरहेका छन् । गाउँघरमा तिहारको झिलिमिली चलिरहेको बेला उनीहरू स्नेहपूर्वक बुबाको काजकिरिया गरिरहेका छन् । स्थानीयले छोरीहरूलाई स्याबास दिँदै वियोगमा साथ दिइरहेका छन् ।
शाही परिवारको यो निर्णयले समाजमा नयाँ सन्देश प्रवाह गरेको छ । केहीले पितृसत्तात्मक परम्परालाई चुनौती दिँदै छोरीहरूले गरेको कदमलाई स्वागत गरेका छन् । सुन्दरहरैँचा ५ का वडाध्यक्ष गणेश चौधरीले भने– किरिया गर्ने अधिकार छोरीहरूले आफै स्थापित गर्दै जानुपर्छ ।
छोराले मात्र किरिया बस्नु पर्छ भन्ने सामाजिक परम्परा अन्त्य भए मात्र छोराछोरी दुवै बराबरी भन्ने नारा समेत सार्थक हुने स्थानीय शिवकुमार भट्टराई भोजपुरेले बताए।
