काठमाडौं : नेकपा एमालेका पोलिटब्युरो सदस्य तथा पूर्वमन्त्री महेश बस्नेतले हालैको राजनीतिक घटनाक्रमपछि पार्टी कार्यकर्ता र जनसमुदायलाई धैर्य र संयमताका साथ अघि बढ्न आह्वान गरेका छन् । बुधबार बस्नेतले सामाजिक सञ्जालमार्फत भावनात्मक सन्देश जारी गर्दै पार्टी पुनः सशक्त रूपमा स्थापित हुने प्रतिबद्धता व्यक्त गरेका हुन् ।
बस्नेतले साहित्यकार नेत्रलाल अभागीको भनाइ उद्धृत गर्दै, ‘आँधी र हुरी नचलेको बेला कायरले पनि बहादुरीका कुरा गर्छ, तर आँधी-हुरीसँग पौठेजोरी खेल्दै ठिङ्ग उभिन सक्ने, सतिसाल मात्र हुन्छ’ भन्दै विषम परिस्थितिमा विचलित नभई डटेर सामना गर्नुपर्नेमा जोड दिएका छन् । उनले पार्टीका आमाबुबा, दाजुभाइ, दिदीबहिनी र सम्पूर्ण साथीहरूलाई धैर्य धारण गर्न र संयमित बन्न आग्रह गरेका छन् ।
पूर्वमन्त्री बस्नेतले सुरक्षा निकायको निर्देशन पालना गर्न र एकअर्कामा हातेमालो गर्दै समस्यामा परेका साथीहरूलाई नछोड्न आग्रह गरेका छन् । उनले निजी वा सार्वजनिक सम्पत्ति जल्न नदिन, लुटपाट र तोडफोडमा संलग्न नहुन र जनजीवनलाई फेरि सही बाटोमा ल्याउन सबैलाई आह्वान गरेका छन् ।
‘घर जलाइयो, सम्पत्ति नष्ट गरियो । तर हाम्रो आत्मा, हाम्रो जनताप्रतिको समर्पण आगोले जलाउन सक्दैन,’ बस्नेतले थपेका छन्, ‘साथीहरू, आँधीपछि आकाश अझ नीलो हुन्छ। आज हामी पीडामा छौँ, तर भोलि हामी सतिसालझैँ अडिग भएर उठ्नेछौं ।’
