सोमबार काठमाडौंमा भएको एक पत्रकार सम्मेलनमा अध्यक्ष शेर्पाले तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकको पनि बयान लिएर अनुसन्धान अघि बढाउनुपर्छ भनेर आफूहरूले भदौ २३ गते बेलुका नै भनेको स्मरण समेत गरे ।

‘दोषी देखिए उहाँहरूलाई पनि कारबाही गर्नुपर्छ भनेर हामीले यो आज मात्रै होइन, सेप्टेम्बर ८ को बेलुका जुन घटना घट्यो, त्यतिबेला नै हामीले प्रधानमन्त्रीज्यू र गृहमन्त्रीज्यूले यसको नैतिक जिम्मेवारी लिनुपर्छ,  उहाँहरूले राजीनामा दिनुपर्छ र, शक्तिशाली छानबिन आयोग गठन गरेर यसको निकास दिनुपर्छ भनेर भनेका थियौं’, अध्यक्ष शेर्पाले भने, ‘अहिले पनि त्यो विषयमा हाम्रो स्पष्ट धारणा छ । तत्कालीन प्रधानमन्त्री र गृहमन्त्रीज्यूलाई पनि छानबिनको दायरामा ल्याएर दोषी देखियो भने उहाँहरूलाई पनि कारबाही गर्नुपर्छ । र, त्यो छानबिनको दायरामा काठमाडौं महानगरपालिकाका प्रमुख बालेन्द्र साह पनि आउनुपर्छ ।’

बालेनले आफूलाई जेनजी आन्दोलनको लिडर भनिरहेको समेत शेर्पाले बताए । उनीहरू सबैलाई अनुसन्धानको दायरामा ल्याउनुपर्छ भन्ने नेपाल विद्यार्थी संघको ठम्याइ रहेको शेर्पाले बताए ।