काठमाडौं : राष्ट्रिय सभा सदस्य डा. बेदुराम भुसालले आगामी दिनमा राष्ट्रिय सभा प्रतिनिधि सभाको प्रति-छायाजस्तो नबनी स्वतन्त्र पहिचानसहितको प्रबुद्ध सभाका रूपमा स्थापित होस् भन्ने कामना व्यक्त गरेका छन् ।
सोमबार राष्ट्रिय सभामा बिदाइ सम्बोधन गर्दै उनले राष्ट्रिय सभाले आफ्नै गरिमा, भूमिका र जिम्मेवारीसहित काम गर्नुपर्ने आवश्यकता औँल्याए । “यो सभा प्रतिनिधि सभाको प्रति-छाया नबनी छुट्टै पहिचान बोकेको प्रबुद्ध सभाका रूपमा अगाडि बढोस्,” उनले भने ।
डा. भुसाल २०७६ माघमा राष्ट्रिय सभा सदस्यमा निर्वाचित भएका थिए । आफ्नो छ वर्षे कार्यकालमा कानुन निर्माण प्रक्रियामा सक्दो योगदान दिएको उल्लेख गर्दै उनले राष्ट्रिय सभामा केही सकारात्मक अभ्यासहरू स्थापित भएको बताए । समयमै बैठक बस्ने, स्पष्ट समय तालिकासहित काम गर्ने, कानुन कार्यान्वयनको मूल्याङ्कन गर्नेजस्ता अभ्यासहरू सुरु भएको उल्लेख गर्दै उनले ती अभ्यासहरूले आगामी दिनमा पनि निरन्तरता पाउनुपर्ने धारणा राखे ।
“कानुन निर्माणका क्रममा सकारात्मक कामहरू भएका छन्, केही मानकहरू पनि स्थापित भएका छन्,” उनले भने, “तर कर्मचारीतन्त्रमा पुरानै ढाँचालाई निरन्तरता दिने प्रवृत्ति देखिन्छ, जसलाई मैले नकारात्मक रूपमा लिएको छु।”
