बुटवल : पाल्पाको तिनाउ गाउँपालिका–३ स्थित तिनाउ खोला ड्याममा पौडी खेल्ने क्रममा डुबेर बेपत्ता भएका भारतीय युवक मृत अवस्थामा फेला परेका छन् ।
जिल्ला प्रहरी कार्यालय पाल्पाका अनुसार भारतको सिद्धार्थनगर जिल्लाको नौगढ गाउँ निवासी अन्दाजी २२ वर्षीय सौरभ रस्तोगी मृत फेला परेका हुन् ।
उनी साथीहरूसँग घुम्न आएका बेला बुधबार साँझ करिब ६ः३० बजे ड्याममा पौडी खेल्ने क्रममा डुबेर बेपत्ता भएका थिए ।
घटनापछि प्रहरी चौकी दोभानबाट प्रहरी टोली खटिएको थियो भने नेपाल प्रहरी र सशस्त्र प्रहरी बल नेपालको संयुक्त टोलीले रातभर खोजतलास गरेको थियो ।
प्रहरीका अनुसार आज घटनास्थलदेखि करिब ५० मिटर दक्षिणतर्फ तिनाउ नदीको ढुङ्गाको खोँचमा अड्किएको अवस्थामा रस्तोगीको शव फेला परेको हो ।
जिल्ला प्रहरी कार्यालय पाल्पाका डीएसपी भिमलाल भट्टराईले घटनाबारे थप अनुसन्धान भइरहेको जानकारी दिए ।
