काठमाडौं : प्रधानमन्त्री पुष्पकमल दाहाल प्रचण्डले आफू नेपाली कांग्रेससँग अहिले पनि सहमतिकै पक्षमा रहेको बताएका छन् । सहकारी ठगीबारे संसदीय छानविन समिति बनाउन आफू तयार रहेको पनि प्रधानमन्त्री दाहालको भनाइ छ । कार्यदलमा सहमतिको प्रयास टुंगिनै लाग्दा नेपाली कांग्रेसलाई कसैले भड्काएको प्रधानमन्त्रीको गुनासो छ ।
कान्तिपुर मिडिया ग्रुपका अध्यक्ष कैलाश सिरोहियाको गिरफ्तारीको विषयमा प्रधानमन्त्रीलाई ध्यानाकर्षण पत्र दिन बुधबार अपराह्न बालुवाटार पुगेका सम्पादकहरुको टोलीसँग कुरा गर्दै प्रधानमन्त्री दाहालले आफू सहमतिका साथ अगाडि बढ्न चाहेको बताएका हुन् । तर, नेपाली कांग्रेस र आफूवीचको राम्रो सम्बन्धलाई कसैले भड्काएर खेल्न खोजेको आशय प्रधानमन्त्रीले प्रकट गरेका थिए ।
‘नेपाली कांग्रेसलाई कसले भड्कायो थाहा छैन,’ प्रधानमन्त्री दाहालको भनाइ थियो, ‘तर, म अहिले पनि सहमतिकै पक्षमा अघि बढ्ने प्रयासमा छु । संसदीय समिति बनाएर अघि जाने पक्षमै छु ।’
प्रधानमन्त्री दाहालले यस्तो बताइरहँदा जेठ ७ गते संसदमा प्रधानमन्त्री दिएको अभिव्यक्ति पनि स्मरणीय रहेको कांग्रेस नेताहरु बताउँछन् । सो दिन प्रधानमन्त्रीले कांग्रेसलाई चेतावनी दिँदै भनेका थिए,‘नेपाली कांग्रेसले गल्ती ग¥यो । यसको मूल्य निकै चर्को पर्न सक्छ ।’
सम्पादकहरुसँगको भेटमा प्रधानमन्त्री दाहालले कैलाश सिरोहियाको गिरफ्तारी गृहमन्त्री रवि लामिछानेको एकल निर्णयबाट नभएर त्यसमा आफ्नो पनि निर्देशन रहेको र सो गिरफ्तारीको जिम्मेवारी आफूले लिने स्पष्ट पारेका थिए ।
नागरिकताको विषयमा भइरहेको अनुसन्धानलाई प्रेस स्वतन्त्रताको विषय नबनाउन आग्रह गर्दै प्रधानमन्त्री दाहालले भनेका थिए, ‘म रहुञ्जेल प्रेस स्वतन्त्रतामा आँच आउन दिन्नँ, ढुक्कु हुनुहा्ेस् ।’
