रौतहट : रौतहटमा एक पुरुषको शव भेटिएको छ। रौतहटको राजपुर नगरपालिका १ मा धारिलो हतियारले घाँटी रेटेको अवस्थामा शव भेटिएकोले हत्या भएको आशंका गरिएको छ।
राजपुर नगरपालिका १ पिपरा भगवानपुर देखि पूर्वतर्फ शेख इद्रिस गेट छेउ हुलाकी सडक खण्ड नजिकै एउटा खेतमा करिब ४५ वर्षीय पुरुषको शव भेटिएको हो । हत्या भएको पुरुष भारतीय भएको अनुमान गरिएको छ।
स्थानीय बासिन्दाहरूले पुरुषको शव देखेपछि जिल्ला प्रहरी कार्यालय रौतहटलाई जानकारी गराएका थिए । घटनाबारे जानकारी पाउनासाथ प्रहरीको टोली घटनास्थल पुगेर अनुसन्धान थालेको थियो । प्रहरीको प्रारम्भिक अनुसन्धानबाट पुरुषलाई धारिलो हतियारले घाँटी रेटेर हत्या गरिएको देखिएको जिल्ला प्रहरी कार्यालय रौतहटकी प्रवक्ता डिएसपी एलिजा गिरीले बताएकी छन् ।
शव भेटिएका पुरुषको हत्या शव रहेकै ठाउँमा गरिएको हो वा अन्यत्र हत्या गरेर त्यहाँ ल्याएर फालेको हो भन्ने अझै खुल्न नसकेको र घटनाको बारेमा गम्भीरतापूर्वक अनुसन्धान भइरहेको डिएसपी गिरीले जानकारी गराएकी छन्।मृतक पुरुषको शव प्रादेशिक अस्पताल गौरमा राखेर सीमा पारी काउन्टर पार्टसका सुरक्षा अधिकारीलाई खबर गरिएको डिएसपी गिरीले बताएकी छन्।
