विराटनगर : कोशी प्रदेश सरकारको सत्ता साझेदार राप्रपाले मुख्यमन्त्री हिक्मत कार्कीलाई विश्वासको मत दिने बताएको छ ।
राप्रपा कोशी प्रदेशका संसदीय दलका नेता तथा तथा प्रदेश सरकारका कृषि उद्योग सहकारी तथा पूर्वाधार मन्त्री भक्ति सिटौलाले मुख्यमन्त्रीलाई आफ्नो पार्टीले विश्वासको मत दिने बताए ।
उनले भने , हामी हाम्रो सरकार टिकाउन लाग्नेछौ । यो सरकारले विश्वासको मत पाउँछ ।
उनले मुख्यमन्त्री कार्कीले आजको कोशी प्रदेश सभाको बैठकमा विश्वासको मत पाउने बताए ।
उनले भने, हामी सत्ता साझेदार दलका रूपमा छौ । सत्ता साझेदार दल भएका कारण यो सरकार टिकाउनु हाम्रो कव्य हो । उनले कसरी विश्वासको मत पाउँछ ? भन्ने जिज्ञासामा भने बैठकमै सबै कुरा थाहा हुने बताए ।
कोशी प्रदेश सरकारमा रहेको जसपाले जेठ १९ गते यो सरकारलाई दिएको विश्वासको मत फिर्ता लिएको थियो । यस्तै माओवादीले पनि जेठ २३ गते हिक्मत कार्की नेतृत्वको सरकारलाई दिएको समर्थन फिर्ता लिएको थियो ।
कोशी प्रदेश सभामा ९३ सिट रहेको छ । विश्वासको मत लिन ४७ सिट आवश्यक पर्दछ । सत्ता साझेदार राप्रपासँग ६ र एमालेसँग ४० गरेर ४६ सिट रहेको छ ।
कोशी प्रदेश सभामा नेपाली काँग्रेसको २९, माओवादीको सभामुख सहित १३ एकीकृत समाजवादीको ४ र जसपाको १ सिट रहेको छ ।
कोशी प्रदेश सभाले विश्वासको मत लिने प्रयोजनका लागि आज १ बजे प्रदेश सभा बोलाएको छ ।
