काठमाडौं : राष्ट्रपति रामचन्द्र पौडेलले देशका विभिन्न भागमा जारी अविरल वर्षा र त्यसबाट उत्पन्न बाढी, पहिरो तथा डुबानको जोखिमप्रति गम्भीर चिन्ता व्यक्त गर्दै सबैलाई सजग रहन आग्रह गरेका छन्।
उनले विपद्को यो घडीमा धैर्यतापूर्वक चुनौतीको सामना गर्न आम नागरिकलाई र उद्धार तथा राहत कार्यमा तीव्र गतिमा खटिन राज्यका सबै निकायलाई अपिल गरेका हुन्।
शनिबार एक अपिल जारी गर्दै राष्ट्रपति पौडेलले भनेका छन्, ‘देशभर जारी अविरल वर्षा र त्यसबाट उत्पन्न बाढी, पहिरो तथा डुबानको खतराबाट सजग रहँदै यो विपद्मा धैर्यतापूर्वक चुनौतीको सामना गर्न म सम्पूर्ण दाजुभाइ तथा दिदीबहिनीहरूलाई आग्रह गर्दछु।’
यसैगरी, उनले यो विपत्तिको घडीमा शीघ्र उद्धार र राहतका लागि खटिन राज्यका सबै निकायलाई पनि अपिल गरेका छन्। राष्ट्रपतिले विपद्मा परेका नागरिकहरूको जीवन रक्षालाई पहिलो प्राथमिकतामा राख्न सम्बन्धित निकायहरूको ध्यानाकर्षण समेत गराए।
