रौतहट : नेपाल कम्युनिस्ट पार्टीका नेता श्रीप्रसाद मुखिया (चन्द्रिका) को हृदयाघातका कारण निधन भएको छ ।
यमुनामाई गाउँपालिकाका पूर्वअध्यक्ष समेत रहेका मुखियाको सोमबार राति उपचारका लागि अस्पताल लैजाने क्रममा बाटोमै निधन भएको हो ।
राति करिब १२ बजे अचानक हृदयाघात भएपछि उनलाई तुरुन्तै वीरगञ्ज लैजान खोजिएको थियो । जनयुद्धकालमा जिल्ला सेक्रेटरीको जिम्मेवारी सम्हालेका मुखिया रौतहटको राजनीतिमा एक प्रभावशाली र जुझारु नेताका रूपमा परिचित थिए । उनको असामयिक निधनको खबरले रौतहटको राजनीतिक तथा सामाजिक क्षेत्र स्तब्ध बनेको छ ।
मुखिया २०७४ सालको स्थानीय तह निर्वाचनमा यमुनामाई गाउँपालिकाको अध्यक्ष पदमा निर्वाचित भएका थिए । आफ्नो कार्यकालमा उनले गाउँपालिकाको विकास र सामाजिक न्यायका पक्षमा महत्त्वपूर्ण कार्य गरेको स्थानीयहरु सम्झन्छन् । पार्टी संगठन विस्तार र जनताको हकहितका लागि उनले जीवनभर खेलेको भूमिकाको सहकर्मी र शुभेच्छुकहरुले उच्च मूल्याङ्कन गरेका छन् ।
